2009/10/15

> Berria: Justizia > GALICIA: O TXSG ABULA A SENTENZA DO CRIME DA RUA DO PORTO

  • O TSXG anula a sentenza do crime da rúa do Porto
  • A petición feita pola Fiscalía e a acusación particular de repetir o xuízo do crime da rúa do Porto de Vigo foi tida en conta polo Tribunal Superior de Xustiza de Galicia (TSXG). O máximo órgano xurídico galego decidiu anular a sentenza na que un xurado popular absolveu ao autor confeso dos feitos do delito de asasinato e o condenou a 20 anos por un delito de incendio.
  • A Nosa Terra, 2009-10-15
Tanto os familiares e amigos das vítimas como o movemento social xurdido coa publicación da sentenza celebran a decisión do TSXG, aínda que, polo momento descoñecen os termos técnicos nos que se vai repetir o xuízo.

Rober Bass, pai do movemento de Facebook 'Tod@s contra o tribunal popular homófobo de Vigo' na rede, que promoveu a repetición do proceso por considerar que o xurado popular tomou unha decisión “homófoba e chea de prexuízos”, amosouse satisfeito coa anulación da sentenza.

“Todos tiñamos claro que o Tribunal Superior de Xustiza ía inclinarse pola anulación do xuízo, pero había que esperar a que se pronunciase”, dixo.

Polo momento o TSXG non indicou os termos nos que se vai a producir o segundo xuízo polo dobre crime da rúa do Porto. “Non sabemos se vai ser cun xurado profesional, como pedíamos, ou novamente cun xurado popular. O que está claro é que grazas ao Facebook o caso non quedou esquecido e agora a opinión pública coincide connosco en que o veredicto non era correcto, porque o asasino non actuou en defensa propia”, explica Bass, que agarda que o novo proceso xudicial se desenvolva dende “o punto de vista da Xustiza, sen miramento nin prexuízos”.

Recurso de apelación
Coa anulación da sentenza o TSXG tivo en conta os recursos de apelación presentados pola Fiscalía e a acusación popular. Ambas partes coincidían en que a sentenza que absolvía a Xacobo P.R. dos delitos de asasinato de dous mozos e o condenaba a 20 anos de cárcere por incendiar a vivenda das vítimas “incumpría” as garantías procesais.

Na sentenza o xurado popular tivo en conta como eximentes de pena o “medo insuperábel” e a “lexítima defensa” do agresor, para absolvelo do delito de asasinato.

No hay comentarios:

Publicar un comentario